Baghdad buaina chhuaka thi 26 an tling tawh

Iraq khawpui, Baghdad-a nawrh huaihawtnaa buaina chhuak vanga thi chu mi 26 an tling tawh a, mi 1,500 chuangin hliam an tuar bawk. 

Unemployment leh corruption avanga Iraq sorkar laka lungawi lohna lantir a, Baghdad-a nawrh huaihawtnaah tharum thawhnate a thlen tel avangin Iraq sorkar chuan Ningani khan curfew a lo puang tawh a ni. Mahse hetichung hian mi eng emaw zat chuan nawrh huaihawt chhunzawm an tum a, security force-ten an hnawtdarh a ni. 

Iraqi Independent High Commi­ssion for Human Rights (IHCHR) member Ali al-Bayati chuan ni thum chhung Baghdad-a nawrh huaihawtnaa buaina chhuak vanga thi, mi 26 zingah hian security force member pahnih an tel tih a sawi. Hliam tuar zingah security force 401 an tel bawk a, mahse hliam tuar tam zawk chu damdawi-in panpui an nih hnuah haw tir leh nghal an ni.