NKorea-in US nena inbiakna chhunzawm a duh lo

Sweden khawpui Stockholm-a Pyongyang nuclear programme chungchanga United States leh North Korea palaite inbiaknaah, North Korea lam hian US palaiten an beisei loh lam ngaihdan an vawrh avangin an inbiakna an titawp.

Kar kal ta Inrinni khan US leh NKorea palaite hian darkar kua zet inbiakna an neih hnuah neih chhunzawm zel chu NKorea lam hian a duh ta lo a ni. North Korea top negotiator leh chief nuclear negotiator Kim Myong Gil chuan US lam hian an thil thlirdan leh ngaihdan hlui chu an la thlak loh avangin kan ṭhulh a ni, a ti.

Kim Jong Un chuan North Korea lamin US nena inbiakna neih chhunzawm tur an ṭhulh chhan hi, "Kan beisei loh anga ngaihdan an neih vang leh an duhdana kalpui min tum vang a ni," tiin NKorea embassy kawta thuthar thehdarhtute hmaah a sawi.

Hetihlai hian US state depart­ment thupuangtu Morgan Ortagus chuan, NKorea palaite lakah hian US chuan ngaituahna thar ṭha tak leh thutlukna fel tak nen inbiakna neih an beisei thu sawiin, NKorea thiltih dan chu pawi a tih thu a sawi. Hemi rual hian Sweden-in kar hnih hnua inbiakna nei leh tura a sawmna chu US chuan a pawm nghal tih a sawi bawk. 

NKorea hi US-in kawng hrang hranga a ṭanpui ṭhinna a titawp sak avangin, US lakah hian a lungawi lo hle. Inbiakna hi neih chhunzawm thei lo mah se Kim chuan Korean peninsula-a nulcear chungchanga US nena inbiakna neih chu a la hreh loh thu a sawi bawk. 

Kumin June 30 khan US presi­dent Trump leh NKorea leader Kim hian Demilitarized Zone (DMZ) chungchangah meeting an lo nei tawh a, hemi hnua mumal taka US leh NKorea inbiak neih tum leh hmasak berna ni mah se, Nkorea palaite chu US palaite thu rawn kenah an lungawi lo a ni.