Ecuador-a nawrh huaihawt 350 vel man

"Misualte inbiakna ka neihpui dawn lo" - Ecuador President 

Tuialhthei mana mipuiten subsidy an hmuh ṭhin tihtawp avanga Ecuador mipuiten ni hnih chhung lungawi lohna an lantir hnuah pawh president Lenín Moreno chuan ,"Misualte inbiakna ka neihpui dawn lo", tiin a la sawi. Mipui lungawi lo ten na takin nawr mah se Mareno chuan a thutlukna chu a hnukkir dawn lo tih sawiin, misual thil phutah ka inphah hniam dawn lo tiin a la ṭang tlat a ni.

Ningani liam ta aṭang khan nawrh huaihawt hi ṭanin, Presi­dent-in subsidy tihtawp a ni dawn tih a puan hnu lawk khan duh lohna lantirtute chuan ramchhung hmun hrang hrangah kawngpui dangin, inkalpawhna pawh hmun tam takah chuan a buai zui. Hemi hnu hian Moreno hian ni 60 chhung atan 'state of emergency' a puang zui bawk.

Zirtawpni pawh khan nawrh huaihawttute hi an la pungkhawm nasa hle a, an ram khawpui Quito leh Guayaquil khawpuiahte chuan 'barricade' hmangtea kawngpui tam tak dangin, hmun tam takah motor kete an hal bawk a ni.

Ecuador interior ministry chuan nawrh huaihawt mi 350 vel zet an man tawh tih sawiin, hmun tam takah chuan mipuite leh police-te an innek buai tih an sawi bawk. He innawrbuainaah hian police officer 28 chuan hliam an tuar tawh a, car eng emaw zat tihchhiat ni bawkin, sorkar inte pawh an bei a ni.

Buaina nasa tak chhuak karah hian Mareno chuan mipui tam zawkin a thutlukna chu an thlawp tih a sawi thung. Ecuador President hian mipui­ten kum 40 vel zet tuialhthei mana subsidy an hmuh ṭhin chu tihtawp a nih thu a sawi. Sorkar chuan kum khatah $tld 3 vel zet an seng ṭhin tih sawiin, economy ṭhatna tur leh ba tam lutuk tihziaawmna tura a hmalakna  a nih thu a sawi a ni.