Cameroon eptu hruaitu chhuah zalen

Cameroon eptu hruaitu Maurice Kamto chu kar kal ta Inrinni khan, a tanna Kondengui Central Prison aṭanga chhuah a nih thu military court chuan a sawi. 

Kamto bakah hian a ruala tang amah thlawptu Valsero, Christian Penda Ekoka, Paul Eric Kingue, Albert Nzongang, Michelle Ndoki, Mamadou Mota leh midang 97-te chu chhuah an ni bawk. Kumin January 26 khan Kamto leh a thlawptu midang 104-te chu man an ni. Kamto-a party Cameroon Renaissance Movement (MRC) chuan nikuma an ram President inthlannaa Paul Biya a chak avangin, inthlan result felfai tawk loah ngaiin sorkar laka lungawi lohna an lantir a, hei vang hian man a ni. 

President inthlanna neihah hian Kamto chuan vote 14.2% a hmu a, a khingpui Paul Biya chuan vote 71.3% a hmu bawk. Kamto hi chak lo mah se President-ah inchhalin, inthlan result chu felfai tawk loah a puh a, mahse a puhna hi Constitutional Council chuan a hnawlsak.

Kamto leh a thlawptu midang 104-te chhuah an nih bakah hian, kum 2017-a Cameroon ram aṭanga indan tum Southern Cameroons (Ambazonia)-a English ṭawng hmang an man mi 333-te chu chhuah an ni bawk. Chhuah an nih chhan hi naktuk aṭanga National Dialogue Confer-ence neih turah tang zinga hruaitu ṭhenkhatte tel ve tura an duh vang pakhat a ni.