Iraq nawrh vangin mi 104 thi tawh

Iraq Interior ministry thupuangtu chuan Pathianni thleng khan an ram khawpui Baghdad leh Iraq khawpui danga duh lohna lantirnaah mi104-in an thih phah tawh bakah mi 6,000 aia tam chuan hliam an tawrh phah tawh tih a sawi.

Press conference neihnaah ministry thupuangtu Saad Maan chuan hemi chungchang hi a sawi a, thi zinga pariat hi security member an ni tih a sawi bawk.

Duh lohna lantirnaah hian mi 6,107-in hliam an tuar tawh tih sawi bawkin, heng zinga 1,241 hi chu security force zinga mi an ni a, security leh tualchhung mite lirthei 52 chu tihchhiat a ni tawh tih a sawi bawk a ni. Pathianni pawh khan silai keng, tunge an nih tih hriat lohten tualchhung leh ramdang media-te inkulhna hmun an bei bawk. Heng zingah hian NRT, Dijlah, Saudi-based al-Arabiya TV leh al-Hadath TV office-te pawh a tel.

Mipui thinrim hian political party hrang hrang pariat office-te chu hal chhe tawh bawkin, security checkpoint pawh pahnih an halchhe tawh bawk. Iraq-ah hian kar liam ta Thawhlehni aṭang khan hna vang leh public service chhiat vangin nawrh huaihawt ṭan a ni a, buaina a punlun chhoh zel avang hian UN pawhin nawrh huaihawttute chu an nawrh titawp turin a lo ngen tawh a ni.