Pawngsual thubuaiah Nepal Parliament speaker hlui man

Nepal Parliament spea­ker hlui, Krishna Bahadur Mahara chu assembly-a thawk hmeichhe pakhatin pawngsualtua a puh avangin Pathianni zan khan police-ten an man. 

District court-in manna tur thupek a tihchhuah hnuah, police-te chuan Mahara hi Kathmandu-a a chenna in aṭangin an man a ni. Mahara hi rorellai, Nepal Communist Party senior member niin, Maoist hel hlui a ni. Pawngsualtua puh a nihna hi thu dik lo niin a sawi thung. 

Assembly-a thawk hmeichhia hian September 29 zan khan Mahara hi a chenna inah a kal tih sawiin, zu pawh a rui tih a sawi. Mahara hian zu a in luih tir hnuah a khawih ta tih a sawi a ni. Kut pawh a thlak tih sawiin, a kut leh keahte pawh hliam a nei. He thil thleng chungchangah hian thubuai a thehlut nghal mai lo a, a sawi chhuah hnuah pawh vauna a tawh avangin a inhnukkir leh a ni. Mahse kar kal ta Zirtawpni khan police-ah complaint a thehlut leh a ni. 

Complaint thehluh a nih hnu hian United Nations leh Nepal-a foreign embassy-te chuan thuchhuah inṭawm siamin, sorkar chu hmei­chhiate laka tharum thawhtu chungah hremna  lekkawh ngei tura an phut thu an sawi. Mahara hming erawh an sawilang lo thung.