China-ah Pakistan PM a zin

Pakistan prime minister Imran Khan chu nimin khan ni hnih cham turin China-ah a zin.

Pakistan PM hi Chinese Minister for Culture Luo Shugang, Pakistan-a China ambassador Yao Jing leh Pakistan official-ten an lo hmuak a ni. A cham chhung hian China president Xi Jinping leh premier Li Keqiang-te bakah hruaitu pawimawh dangte a hmu dawn a, ram pahnihte inlaichinna chungchangte a sawipui ang. 

China hi Pakistan ṭhianṭha tak a ni a, tunhnaia Kashmir chungchang avanga India leh Pakistan inkar boruak ṭha lo leh inepna awm mekah pawh China chuan Pakistan hi a thlawp thu a lo sawi tawh a ni. 

Imran Khan hian China-Pakistan Economic Corridor (CPEC) hnuaia project tihlen dan te, agriculture, industrial leh socio-economic sector lama ram pahnihte thawhdunna tur hrang hrangte a sawipui dawn a ni. Nimin khan Beijing-a China-Pakistan Business Forum neih chu a hmanpui nghal bawk.