Al-Qaeda hotu Asim Omar thah a ni

Afghanistan chhim lama awm Musa Qala district-a US-Afghan-te'n Al-Qaeda firfiakte an beihnaah, Al-Qaeda South Asian branch hotu Asim Omar chu thah a nih thu Afgha­nistan National Directorate of Security (NDS) chuan thuchhuah an siam.

Pakistan mi Omar hi Musa Qala district-a Helmand pro­vince-ah September 23 khan thah a ni tih hi, Thawlehni khan finfiah a nih thu Afghan official-te chuan an sawi. TOLO telvision channel chuan Omar bakah hian Al-Qaeda fir­fiak paruk chu Musa Qala hmuna Taliban compound-ah thah an nih thu an tarlang bawk. 

Heng an thahte bakah hian mi 14 chu man an ni bawk. Al-Qaeda firfiakte an beihna hmun hnaiah hian innei an awm a, inneia kal mi 40 chuang zingah hian an inbeihna avanga nunna chan leh hliam pawh an awm bawk a ni.

Afghanistan sorkar thupuang­tu Ashraf Ghani chuan civil mite'n nunna an chan avangin leh, hliam tuar an awm avangin pawi a tih thu a sawi.