Afghanistan President thlanna result puang ta

Afganistan Independent Elec­tion Commission (IEC) chuan hun rei tak an tikhawtlai tawh, an ram President thlanna result chu Thawhlehni khan a puang ta. 

IEC hian nikuma September thlaa President thlanna result chu thla nga zet hnuah puangin, president nilai  Ashraf Ghani chuan vote tlaa 50.64% a hmuin President thar atan thlan tlin a ni tih a puang. 

Ghani hian a khingpui Chief Executive Abdullah Abdullah chu khing tla in, ani hian vote tla aṭangin 39.52% a hmu thung. 

Inthlan result tihchhuah hi Abdullah chuan pawm loin nasa takin a sawisel zui nghal.  IEC chuan ṭan lam a neih thu leh, inthlanah hian amah zawk chu hnehna changtu nia insawiin sorkar thar a siam dawn tih a sawi bawk. 

Nikum September 28 khan president thlanna result hi October 19 khan a puan hun tura ruat a ni. Mahse IEC official-te chuan chhuanlam hrang hrang - khawl lam fel loh vang, vote tihchingpen leh candidate-a lungawi lohna chhuanlamin result puan hi a tikhawtlai zel a ni. December thla khan result hmahruai erawh puan a ni a, Ghani hi vote tlem tea a tlin thu tarlan a ni. Mahse hei hi Abdullah chuan a pawm loh thu a sawi nghal. 

President inthlannaa can­didate-te hi mi 18-an ni. Vote nei mi maktaduai 9.6 awmin, inthlanah hian vote maktaduai 2.7 vel a tla a, mahse thil dik tawk lo a awm nia sawi a nih avangin vote mtd khat dawn hnawl a ni a, vote tla zinga mtd 1.8 chauh chu pawmin chhiar an ni. Inthlan dawn hian Taliban firfiakte chuan mipuite vauin, polling station leh election rally neihna hmunte an bei fo a, hei vang hian vote tla zat pawh a hniam hle a ni. 

Ashraf Ghani hian kum 2009 khan president hi a lo chuh tawh a, mahse vote a hmu tam lo hle. Kum 2014-ah chuh lehin  Abdullah nen bawk hian an inkhing a ni. Hetih laia US Secretary of State, John Kerry rawtna angin Ghani leh Abdullah hian thuneihna insemin sorkar an siam dun a, Gandhi hi President niin Abdullah hi Chief Executive a ni. Mahse sorkar an siam dun chung hian an insawisel tawn fo a, an pahnih inkar ṭha lo vang hian sorkar pawh hnathawk mu­mal thei loin a awm phah fo. Nikum September thlaa President thar tur thlannaah an chuh dun leh ta a ni.