China : Online-a ei tur chahna a lun

China sorkarin an rama hri leng mek, coronavirus, covid-19 laka invenna leh a darh zel tur venna kawng khata atana mipuite pawn chhuak lo tura a hriattir avangin, online hmangin chaw leh ei tur lam zuarte an lun phah hle. 

January thla tawp lam aṭang khan hri darh zel tur venna atana khuahkhirhna hman a nih avangin factory, restaurant, cinema hall, office leh dawr te chu khar an ni. Hetih lai hian e-commerce company lamte erawh an lun zual thung a, a bikin ei tur leh nitin khawsakna a mamawh zuarte chuan ṭum dang zawng aiin order an hmu hnem. 

JD.com Inc.chuan January thla chhung khan buhfai, maida leh chaw lam chi ton 71,500 order an hmu tih sawiin, hei hi nikum January thla chhunga order an hmuh aiin a let 20 zetin a tam. Tel leh sa, artui, thlai leh ei tur dang pawh order a pung nasa hle a ni. Pinduoduo Inc. pawhin January thla chhunga apple, strawberry leh thlai dang order-tu chu nikum aiin 120% zetin an pung tih a sawi. Anni bakah e-company dang pawhin order a pun nasat thu an sawi hlawm.

Nimin thleng khan China ramah covid-19 vanga thi hi mi 2,004 an tling tawh. Thawhlehni khan he hri leng vang hian mi 136 an thih belh leh a, a hri vei zat finfiah tawh hi mi 74,185 an tling tawh bawk. 

National Health Commission chuan Thawhlehni khan an ram pumah hri kai thar mi 1,749 an awm tih sawiin, hei hi tun thla chhunga ni khata hri kai thar an tlem ber ṭum a ni.