Turkey leh Syria chungchangah UNSC-in meeting nei

United Nations Security Council (UNSC) chuan Turkey-in Syria hmarlama Kurdish sipaite laka beihpui a thlak chungchang ngaihtuahin, nimin khan emergency meeting a nei. 

Belgium, France, Germany, Britain leh Poland-in a ngen angin emergency meeting hi nimin zing khan neih a ni. UNSC president, South African amba­ssador Jerry Matthews Matjila chuan a hmain Turkey president Recep Tayyip Erdogan hi biain, beihpui a thlak chungchangah insum tura ngenin, civil mite himna ngaihtuah turin a lo ngen tawh bawk a ni. 

Turkey president Erdogan-an 'Ope­ration Peace String' neih a nih tur thu a puan hnuah, Turkey sipaite hian Syria hmarlam, Kurdish sipaite awmna hmun chu an bei nghal a ni. Kurdish kaihhruai Syrian Democratic Forces (SDF) hi US-in Syria-a Islamic State (IS) firfiakte laka beihpui a thlaknaah a thawhpui a, mahse NATO member Turkey chuan Kurds-te chu hmelmaah a ngai thung. Hei vang hian ramria SDF awmte chu umchhuah a duh a, president Erdogan chuan an ramri chu firfiakte kalkawng atana hman an remti lo tih a sawi. Hei vang hian Syria hmar lama Ras al-Ayn khua leh a chhehvela Kurdish ho thunun hnunte chu an bei a ni.

President Erdogan chuan Syria ramria beihpui an thlakna chhan hi firfiakten an beihna tur laka an invenna leh, ramri himna tura ti an nih thu a sawi. 

Jordanian foreign minister Ayman Safadi chuan a twitter-ah Turkey chu Syria a beih titawp tura an ngen thu leh, ram pahnih buaina chu international law chhunga inbiakna hmanga titawp turin an ngen tih a sawi.

Ayman Safadi chuan Syria ram chhunga inbeihna thleng zawng zawng chu an dem tih a sawi. Syria inpumkhatna atana politics buaina chinfel te, Syrian-te dikna chanvo humhim te leh mi zawng zawng himna tura firfiakte hneh chu an duh tih a sawi bawk.