Ukraine President-in Trump-a'n blackmail a tum lo tih a sawi
Ukraine president Volodymyr Zelensky chuan US president Donald Trump-a'n Ukraine sipaite chhawmdawlna a pek ṭhin hreksak vauin blackmail a tum nia sawi chu a dik lo tih a sawi.
President Trump leh Ukraine president Zelensky-te phone-a an inbiaknaah, Trump hian nakkuma US president thlanna neih tura Democrats candidate atana beiseiawm ber, Joe Biden leh a fapa Hunter Biden-te chu chhuichiang turin a ngen nia sawi a ni. A ngenna hi a zawm loh chuan US-in Ukraine hnena chhawmdawlna a pek ṭhin pawh hreksakah a vau nia sawi a ni bawk. He thil avang hian US Congress chuan Trump hi a chhui chiang mek a ni.
Hetihlai hian Trump chuan Joe Biden hian a fapa Hunter-a thawhpui, Ukraine-a gas lama sumdawng lian tak, eiruk chungchanga chhuichian a nihna tur chu Joe Biden hian dan sak a tum niin a sawi thung.
Ukraine khawpui, Kiev-a press conference a neihah, president Zelensky chuan in blackmail-na lam engmah a awm lo tih sawiin, Trump nena an inbiakna chhan chu meeting neih tur chungchang vang a ni, a ti. Meeting neih turah pawh hian US lam hian thil phut engmah an nei lo tih a sawi bawk a, "Inlaichinna ṭha siam kan duh vang chauh a ni," a ti.
Phone-a an inbiak hnuah a defence minister chuan sum chungchangah harsatna a awm thu leh, block a nih thu a hrilh tih Ukraine president chuan a sawi. Mahse hei hi President Trump nena an inbiakna nen inzawmna a nei lo tih sawiin, hemi chungchang hi engmah an sawilang lo tih a sawi.