Croatia President thar lalut

Croatia ramin inde­pendence an hmuh hnua an president pangana tur atan Zoran Milanovic chu nimin khan thu tiam tira lakluh a ni.

Kum dangah chuan Saint Mark’s Square-ah Croatia president lakluh inkhawm hi hman ṭhin a ni a, mahse kuminah erawh chuan Milanovic hian a hautak lo zawnga thil tih a duh avangin, President atana lakluh inkhawm hi Zagreb-a Pantovcak hmuna Presi­dent Office-ah neih a ni a, Constitutional Court hmaah Milanovic hian rinawmna thu a tiam a ni.   

President thar lakluh inkhawmah hian mi sawm bik 43 an tel a, anni bakah hian Milanovic chhungte leh a campaign team-te pawh an tel. 

Croatia president thlanna hi nikum Decem­ber 22 khan neih a ni a, candidate-te zingah president ni thei tura vote hmuh ngai zat hmu pha an awm loh avangin kumin January 5 khan inthlan thawh hnihna neih leh a ni. 

Nikum inthlana candidate zinga vote hmu sang pahnih, presi­dent kal chhuak ta Kitaro­vic leh Milanovic-te chu an inkhing a, Milanovic hian vote tla aṭanga 52.67% a hmuin an ram president a ni thei ta a ni.

Kum 53 mi, Milanovic hian February 19 aṭanga kum 2025 February 18 thleng Croatia president hna hi a chelh dawn a ni. Kum 2011 December 23 aṭanga 2016 January 22 thleng khan prime minister hna a lo chelh tawh bawk.