Palestinian President-in Israel leh US nena inzawmna nei duh tawh lo
Palestinian president Mahmoud Abbas chuan Israel leh US nena inzawmna neih a duh tawh loh thu Arab foreign minister ṭhutkhawmnaah a sawi.
Kar kal ta Inrinni khan Egypt khawpui, Cairo-a Arab League headquarters-ah Arab foreign minister ṭhutkhawmna neih a ni a, he hunah hian kalkhawmte hmaah Abbas chuan Israel leh US nena eng inzawmna mah neih a duh tawh loh thu a sawi a ni.
Abbas-a'n ram pahnihte thawhpui a duh loh chhan hi kar liam ta Thawhlehnia White House-a Trump leh Israel prime minister Benjamin Netanyahu te'n 'Trump peace plan' chung changa an hmalak dan tur an sawinaa Jerusalem chu Israel ho kuta hlan a nih tur thu a tel vang a ni.
He Trump peace plan-ah hian Jordan Valley leh West Bank hmun ṭhenkhatte chu Israel kuta hlan a nihna tur thute a inziak bawk a ni. Hemi chungchang hi Palestine ram chuan an pawm ve loh thu Netanyahu leh US Central Intelligence Agency-te hnenah Abbas chuan lehkha a thawn nghal ve ve bawk.
US chu Israel lam ṭan bikah Abbas chuan a puh a, he peace plan chungchanga US-in Palestine hnena a thawn 'Deal of the Century' lo pawm tura an tih chu Palestine ram chuan a hnawl sak nghal bawk a ni. Trump peace plan hi kum 2017 November thla aṭang khan US chuan Palestine leh Israel ramte inkar buaina awm ṭhin chinfelnaa tih a ni a, he paln hi bung hnihah ṭhenin, economic leh political-ah ṭhen hran a ni. Economic lam hi 'Peace to Prosperity' tih a ni a, nikum June 22 khan peih fel a ni. Political lam hi hmanni lawk khan peih fel a ni thung.
Kum 1967-a UN hnuaia Palestine leh Israel ram buaina chinfel tuma hma laknaah khan East Jerusalem hi Palestinian kuta pek a nih theihna chung chang ziah a ni a, khami zul zui khan Palestine ram chuan East Jerusalem hi an mahni pual chauha neih an duh a ni.