Nobel Peace Prize 2019 Ethiopia PM Ali hnenah hlan dawn

Nobel Peace Prize 2019 chu Ethiopia prime minister Abiy Ahmed Ali hnenah hlan a ni dawn.

Abiy Ahmed Ali hi khawvel puma thawhhona ṭha a awm theihna tur leh remna leh muanna a awm theihna tura nasa taka thawktu a ni a, hemi avang hian Nobel Peace Prize hi hlan a ni dawn a ni. Ramri inchuh vanga 1998- 2000 inkara nasa taka indo, Ethiopia leh Eritrea inkara inkungkaihna ṭha nikum July thlaa a siam leh theih avangin Abiy Ahmed hian Nobel Peace Prize hi a dawng dawn a, he chawimawina dawngtu 100-na tur a ni bawk.

Kuminah hian Nobel Peace Prize dawng tur hian nominee 301 zet chhawpchhuah a ni a, chung zinga 223 chu mimal an nih laiin 78 chu pawl (organisation) an ni thung.  

He chawimawina hian $900,000 a keng tel a, December 10 hian Norway khawpui Oslo-ah sem a ni ang.

Ethiopia prime minister 15-na Abiy Ahmed Ali hi August 15, 1976 khan piangin tunah hian kum 43 mi a ni.

An rama Oromo Democratic Party hruaitu a ni a, nikum April 2 aṭang khan PM dinhmun hi a luah. Federal Democratic Republic of Ethiopia (multiparty election an neih hnu) an nih hnua Prime Minister palina a ni thung.

2001 khan Ethiopian Natio­nal Defense Force-a ṭang chungin computer engineering-ah Bachelor degree, Addis Ababa-a Microlink Information Technology College aṭangin a zo a, Transformational Leadership-ah Master of Arts nei bawkin, Leadstar College of Management and Leadership aṭangin Master of Business Administration a nei bawk.  Institute for Peace and Security Studies, Addis Ababa University aṭangin 2017 khan Ph.D a hmu bawk a ni.

1998 aṭanga 2000 inkara nasa taka Eritrea nena an indona chhan, an inrinaa khua Badme chu nikum July thla khan  Eritrea kuta pek a nih dawn thu hi a kaihhruai sorkar chuan an puang a, hemi hmangin December 12, 2000-a ram pahnihin an ziah Algiers Agreement chu pawmin ram pahnih inkara buaina awm reng chu Abiy Ahmed Ali hian a titawp ta a ni. 

Abiy hi kum 20 chuang zet hnua an ram hruaitu lu ber zinga Eritrea ram hruaitu lu ber hmu leh thei hmasa ber a ni a, nikum khan summit hlawhtling tak an nei a ni. Summit-ah hian inṭhianṭhatna leh muanna awm theihna turin thuchhuah inṭawm an siam thei ta hial. 

Abiy Ahmed Ali hi an rama sakhaw hrang hrangte lungrual taka an khawsak ho theihna tura hmalatu a ni bawk a ni.