China: Rangkachak khura tang 11 chhanchhuak tawh

China-a rangkachak khura tang mi 11-te chu nimin khan chhanchhuah an ni tawh a, tang zawng zawng erawh chhanchhuah an la ni lo.

January 10 khan China Shandong province-a  Qixia khawpuia awm Hushan rangkachak khur luhna chu thil puakin a tichhia a, khur chhunga awm mi 22-te chu chhuak thei loin an tang a ni.

Nimin, Pathianni khan an ram huna chawhma dar 11:13-ah tang zinga an chhanchhuah hmasa ber chu khur aṭang hian an la chhuak niin Xinhua chuan a tarlang a, a taksa a chak tawh lo hle niin an tarlang a, damdawi-in an panpui nghal.

Midang 10-te chu a hmasa ber an chhanchhuahna aia thuk zawk khur aṭangin an khai chhuak a, an zinga pakhat chu a hliam bawk. Midang 11 la tang mek zinga pakhat hi chu a thi tawh niin an hria a,  a dang 10-te chu an thih nge an dam tih an hre lo bawk a ni. 

Chhanchhuah zinga ṭhenkhat chuan chhanchhuah hna thawktute hnenah hian an tanna aṭanga metre 100-a thukah midang pakhat a tang tih sawiin, hun eng emaw chen chu an be pawp thei tawh lo tih an hrilh a, chhanchhuah hna thawktute hian an chhanchhuah tawhte bak hi an be pawp thei lo. 

Thil puahna hmun hi rangkachak khur luhna aṭanga feet 800 vela thukah a ni. An tang tih an hriat hnu hian chhanchhuah hna an thawk nghal a, January 17 khan damchhuakte thawm hi an hre chauh a ni. Thawhṭanni liam taah kha chuan chhanchhuah hna thawktute hian lehkhate pawh an thawn tawh a, heng mite hnenah hian chaw, damdawi leh an intuam lumna turte an pe reng bawk. 

Chian-ah hian a hma pawhin hetiang harsatna hi a thleng zeuh zeuh tawh a, nikum September thlaah pawh khan an ram chhimthlang lama lungalhthei khurah mi 16 chu tangin an thi tawh a; kum 2016-ah pawh khan lungalhthei khura gas puak vangin mi 12 an thi tawh bawk a ni.