IS beihpui thlakah mi panga an thi

Islamic State (IS) firfiak pawlte chuan Iraq khawpui Baghdah hmar lama awm, Salahudin Province-ah Inrinni khan beihpui an thlak a, para­military Hashd Shaabi member panga an thih bakah midang pali an hliam.

IS firfiakte hian Salahudin khawchhak lama Himreen area-a Hashd Shaabi 22nd Brigade  outpost Inrinni tlaiah khan an bei a, an thah zingah hian Brigade commander Abu Alyaa al-Husseini pawh a tel.

Inbeihna a thleng tih an hriat velah hian sipai tirh luh belh nghalin IS lamah hian thi leh hliam awm leh awm lo report a ni lo thung. Iraq-ah hian kum 2017-a Iraq sipaite'n IS an hneh tih an puan hnu khan buaina thleng a tlem sawt hle a, mahse a khat tawkin IS hian hmun hrang hrang an bei reng tho a ni.