Burkina Faso-a Grand Mosque hmunah inkahna thleng

Africa khawthlang lama Burkina Faso rama Grand Mos­que hmuna ṭawngṭaite chu silaia kah niin, mi 16 an thi.

Kar kalta Zirtawpni tlai khan, mi pakhatin silai hmangin Grand Mosque hmuna ṭawngṭaite hi a pawng kah a, pawikhawihtu hi tu nge tih finfiah a la ni lo. A hmunah hian mi 13 an boral nghal a, mi pathum chu an hliam tuar loin a hnuah an boral zui ve leh bawk. Heng bakah hian mi pahnih chu an hliam a nasat em avangin an dinhmun a hlauhthawnawm hle.

Burkina Faso ramah hian Mali ram ṭanga rawn pem firfiak pawl al-Qaida, Islamic State of Iraq-te avangin, sakhuana lamah buaina neuh neuh a chhuak fo a ni. Thihchilh bomb, kalkawnga bomb lo phum ruk leh pawi­khawihna dang hmangin firfiakte hi an che ṭhin a, kuminah mi 600 bawr velin nunna an chan tawh.

Pawikhawihna thleng ṭhin avang hian mi 500,000-te chu an chenna in luah ngam loin, hmun dangah an tlanchhe tawh bawk. Burkina Faso hmuna buaina hian mi maktaduai 1.5 a nghawng thu United Nations refugee agency chuan a tarlang.

Kar kal ta Inrinni khan Burkina Faso khawpui Ouagadougou hmunah mi 1,000 velin kawng zawhin, an rama firfiakte chetna chu an dem thu leh, an rama foreign sipaite inrawlh chu an duh loh thu an lan tir. "Firfiakte beih duh vangin France, America, Canada, Germa­ny leh ramdang sipaite hi kan ramah an lo awm a, mahse firfiakte hi an rawn chhuanlam mai mai a ni. Kan rama firfiakte hi tlem lam aiin pun lam an pan zawk a ni," tiin kawngzawh huaihawttu zinga mi Gabin Korbeogo chuan a sawi.