France leh Germany-in Turkey hnena ralthuam hralh an titawp

France leh Germany chuan Turkey-in Syria-a Kurdish fighter-te laka beihpui a thlak avangin, kar kal ta Inrinni aṭang khan Turkey hnenah ralthuam an hralh ṭhin chu an titawp. 

Europe ram khawpui hrang hrangah Turkey chet dan duh lohna lantirin kawng­zawh te huaihawt a ni bawk. Turkey sipaite chuan kar kal ta Nilaini khan an ramri bula Kurdish sipaite lakah beihpui an thlak ṭan a ni. Kurdish fighter-te hian Syria-a Islamic State (IS) fir­fiakte beihna kawngah US thawhpui mah se, Turkey chuan firfiak angah a ngai thung. 

France defence leh fo­reign ministry chuan thu­chhuah inṭawm siamin, Turkey laka an lungawi lohna lantir nan ralthuam thawn luh tura ruahmante pawh tihtawp vek a ni tih an sawi. Hemi hma lawk hian Germany pawhin Turkey rama ralthuam thawnluh turte chu a titawp vek tih a lo puang tawh bawk a ni. 

Vawiin hian Turkey chungchang ngaihtuahin Luxebourg-ah UE foreign affairs committee meeting neih a ni ang.