Ecuador-in Fuel mana subsidy lak tihtawpna a hnukkir

Ecuador sorkar chuan an ram chhunga nasa taka duh lohna lantirna tihtawpna turin a ram mipuite hnena fuel subsidy a pek ṭhin a tihtawp tur chu a ṭhulh leh niin UN chuan a tarlang.

United Nations leh Roman Catholic kohhran aiawhten pawl pahnihte inbiakna an neihpui hnuah UN hian thuchhuah siamin hei hi an tarlang ta a ni. Pathianni khan remna zawng­tute hian inbiakna hi an nei a, hemi hnu hian sorkar lam chu an inhnukhniam ta a ni. Inbiakna an nei lai hi an state TV-ah live-in an pechhuak bawk. 

An ram khawpui Quito-ah chuan sorkar an inhnukhniam tih puan a nih hnu hian zan rei tawh takah khan nasa taka lawmna neih chhunzawm a ni a, halmawi nasa taka hal a nih bakah car driver-te pawhin motor horn nasa takin an hmet chuah chuah a ni.

Tunah chuan pawl pahnih - sorkar lam leh duh lohna lantirtute hian dan thar, subsidy an hmuh ṭhin chu dan loa ram ṭhenawma a ruka fuel pekchhuahna atana hman a nih lohna tur an buaipui a ngai tawh thung ang. Sorkar official Juan Sebas­tian Roldan chuan dan thar siam tura inbiakna pawh an nei thuai dawn tih a sawi.

Remna leh muanna a awm zel theihna turin commission din a ni dawn bawk a, hemi atan hian Catholic kohhrante leh UN-te chuan hma an la dawn a ni.  Subsidy tihtawp tur ṭhulh chungchanga inbiakna neih zawh hian nawrh huaihawtnaa hruaitu te chu an lawm hle a, president Moreno erawh chuan engmah hemi chungchangah hian a sawi lo thung.

Ecuador president Lenín Moreno hian kar hnih liam ta velah khan an ram mipuiten kum 40 chhung fuel mana subsidy an lo hmuh tawh chu an ram economy ṭhatna turin leh leiba an ngah lutuk tihziaawmna atan tihtawp a nih dawn thu a puang a, hemi hnu hian nasa takin mipuite chuan an ram khawpui Quito-ah duh lohna an lantir zui a ni. Moreno hi hemi avang hian an ram khawpui pahnihna Guayaquil-ah a insawn zui. Moreno chuan subsidy mi­puite hnen aṭanga pek vang hian sorkar chuan kumtin $tld 1.3 an chawi ṭhin tih a sawi.