Japan: Chhanchhuah hna Thawk turin mi 110,000 tir
Japan sorkar chuan thlipui, typhoon Hagibis in chhiatna hrang hrang a thlen tuartute chhanchhuah leh chhawmdawl hna thawk turin mi 110,000 a tir. Thlipui tleh vanga thi hi nimin thleng khan mi 43 an tling tawh a ni.
Chief cabinet secretary Yoshihide Suga chuan nimina press conference a neihah, chhanchhuah hna hi police, firefighter leh coast guard-ten an thawk mek tih a sawi. Thlipui tlehin chhiat a thlenah hian mi 200 chuangin hliam an tuar bawk a, chin hriat lohin mi 16 an la awm mek bawk.
Thlipui hian ruah a ken tel avangin hmun tam takah ruahsur nasain harsatna a thlen bawk. Prefecture 12-ah leimin leh leitawlh hmun 48-ah a thleng a, lui pakua-ah tui a lian bawk a ni. Ruahsur nasa avang hian central leh northern Japan-a in eng emaw chen tuiin a chim a, lei pawh a chhe nual bawk. Tuilian tuarte hi helicopter hmangin hruaichhuah an ni.
Local goverment pakua chuan chhiatna an tawh mekah Self Defence Force puihna an dil a, an zingah hian Tokyoa leh Nagano pawh an tel. Defence minister Taro Kano chuan harsatna tawkte ṭanpui a, chhanchhuah hna thawk tur hian sipai 31,000 tirh an ni tih a sawi.
Pathianni khan thlipui thawk vang hian flight 800 chuang cancel a ni a, nimin erawh chuan domestic flight chu dan pangngai anga thlawh tir an ni. Factory eng emaw zat erawh chuan hna an la thawh chhunzawm lo a, nimin thlenga plant khar zingah hian Toyota Motor Corp., Nippon Steel Corp. leh Sapporo Holdings Ltd. te an tel.
Thlipui tlehin thil a tihchhiat dan kimchang hi hriat chian a la ni lo. Nimin khan thil chhiate thenfai hna hi thawh a ni. Insurance lam chuan thil chhia hi dollar tluklehdingawn 5-10 vel a nih an rin thu an sawi.