Myanmar: Rakhine helhoin bus-a chuangte rubo

Myanmar-a Rakhine hel nia hriatte chuan Pathianni khan bus pakhat dangin, motor-a chuang mi 31-te an rubo tih official-te chuan an sawi. 

Bus hi Rakhine state khaw­pui, Sittwe pana tlan a ni. Mahse kawng lakah helpawl zinga pakhat hi lo phar dingin, a din hnuah soccer uniform-a inthuam hel 18-te chu ramhnuai aṭanga rawn chhuakin bus-a chuangte chu silaia tinin an chhuk­tir a, an man zui nghal a ni. 

Colonel Win Zaw Oo chuan helho hi an chhui mek tih sawiin, bus-a chuangte chu kangṭhelhtu leh insakna hmuna thawktu an ni a, mahse helho hian armed forces chhungte emaw tiin an rubo nia an ngaih thu a sawi. He thil thleng chungchangah hian Arakan Army  helpawlte chu biakpawh tum a ni a, mahse nimin thlen khan anni lam hian thuchhuah engmah an la nei lo. 

Kum 2017 August thlaa Myan­mar sipaiten Rakhine state-a beihpui an thlak avangin he state-a cheng, Rohingya Muslim nuai sarih chuang chu Bangladesh ramah an tlanchhia a ni. UN-in thla hmasaa report a tihchhuahah, Rakhine a cheng Rohingya nuai ruk vel dinhmun chu a la ṭha lo hle tih a sawi. Hetihlai hian Bay of Bengal area hi sipai ven ulukna hmun a nih avangin media leh rights monitor lam pawh duh angin an lut thei lo a ni.