Turkey sipaite Syria ram chhung km 30-35 chinah lut dawn

Turkish president Recep Tayyip Erdogan chuan Pathianni khan Turkey sipaite chu Syria ramchhung chin km. 30-35 inkarah an lut dawn tih a sawi.

Istanbul-a press conference an neihnaah Erdogan chuan hemi chung­chang hi sawiin Hasaka leh Ayn al-Arab an thunun hunah Syria ramchhungah hian beihpui an thlak dawn tih a sawi a ni. Tel Abyad chhehvela thingtlang khaw 17 chu an thawhpui Syria-a helte nen an la tawh tih sawiin, hei hian km 109 bial vel zet a nih thu a sawi bawk.

Turkey hian Nilaini liam ta aṭang khan Kurdish firfiakte lakah Operation Peace Spring an ṭan a, beihpui an thlak hnu hian tualchhung mi 18 an thi tawh a ni. Erdogan chuan an ramria Kurdistan Workers' Party (PKK)-ten beihpui an thlaknaah civil mi 18 an thi tawh tih leh heng zinga a tam ber hi naupang an nih thu a sawi.  PKK beihpui thlaknaah hian hliam 147 an awm tawh tih a sawi bawk.

Turkish province- Sanliurfa, Mar­din, Sirnak leh Gaziantep-ahte chuan laipui ṭum 652 kah a nih tawh bakah rocket-te pawh kah a ni bawk tih sawiin, an beihpui thlaknaah Turkey sipaite chuan Kurdish firfiak 440 an that ve tawh bawk tih a sawi a ni.