China tihphel tumtu chu a thi nghal ang: Xi Jinping

China president Xi Jinping chuan Nepal a tlawhnaah "China tihphel tumtu chu a thi nghal ang," tia a sawi thu Chinese foreign ministry thuchhuah chuan a tarlang.

Xi Jinping hian hetiang thu a sawi chhuah chhan hi, Hong Kong leh Taiwan buaina vang a ni a, he ram pahnihte hi China hian a ram angin a la chhal zel a ni. Hong Kong-a nawrh hawihawt hian ziaawm lam a pan hlei thei lo a, Pathianni khan kawngte leh rel kawngte chu nawrh huaihawtte hian an dang. Hong Kong sorkarin thiam loh a chantir tawhte mainland China-a thawn an nih theihna tur, extradition bill siam hi Hong Kong mipuite hian tun thlengin duhlohna hi an la lantir.

China hian a duh chuan a sipaite hmangin Hong Kong-a buaina hi a thunun thei a, mahse China chuan Hong Kong police-te chu he buaina thunun thei tura a rin tawk thu an tarlang. Taiwan ram hian hmanni lawk khan an ram khawpui, Taipei-a parliament kawtah mi 2000 chuangin Hong Kong-a nawrh huaihawtte an thlawpna lan tirin an pungkhawm ve bawk. Kum 1949-a Taiwan-in civil war a tawh hnu khan, China hian Taiwan-a island ṭhenkhatte chu an ram chinah a la rinlut lui a ni.

Chian hian Hong kong leh Taiwan a la ta neih viau a, hei vang hian Xi Jinping hian an ram hming chu sawi lang lo mah se, henga buaina siamte leh inlak hran tumte chu a dim dawn loh thu hi a sawi a ni.