US-in Turkey ministry a hrek
United States chuan thuchhuah siamin, urkish ministry leh sorkar official senior-te chu Syria hmar lam an beih avangin a hrek.
US vice president Mike Pence chuan hemi chungchangah hian Donald Trump pawhin Turkey president Recep Tayyip Erdogan a be tawh tih sawiin, inremna siampuina turin a bia tih a sawi a ni. Mike Pence chuan Turkey region-ah chuan a rang thei ang bera zin nghal a duh thu a sawi bawk.
US Treasury Secretary Steven Mnuchin chuan Thawhṭanni khan Washington DC-ah thuchhuah siamin Turkish ministry pahnih leh sorkar official senior pathum hrek an nih thu hi a tarlang. Turkey defence leh energy ministry-te chu hrek an nih bakah, defence, energy leh interior minister-te chu hrek an ni bawk. He hrekna hian US-a an thil neihte a huam bakah, US financial system kaltlanga transaction an siam an khapsak a ni.
Thuchhuah an siamah hian Turkey sorkar hmalakna chuan civil mite nunna derthawnga a siam bakah, an chhehvelah ralmuan lohna an thlen tih tarlangin, ISIS (Islamic State) hnehna tura campaign kalpui mek pawh a tibahlah tih an tarlang.
President Trump chuan twitter-ah Turkish steel-a chhiah an lak ṭhin chu 50%-a tihpun a ni dawn tih sawiin, $tld 100 hu insumdawn tawnna tura inbiakna an neih mek pawh tihtawp a ni nghal dawn tih a sawi. US thuchhuah siamah chuan an thawhpuite nena ISIS ram lak 100% an laklet tawh thu tarlangin, an hlawhtlin tawhna chu hlauhthawnawmah Turkey chuan an dah tur a ni lo, tiin an tarlang bawk.