Japan-a thlipui tleh vanga thi zat an pung

Japan rama thlipui, typhoon Hagibis tleh vanga thi chu mi 66 an tling tawh a, chin hriat loha awm mi 150-te zawn chhunzawm mek an ni bawk. 

Thlipui tlehin thil a tihchhiat hrang hrangte thenfai leh siamṭhat hna thawh mek a ni a, hetihlai hian nimin thleng khan mi tam tak chu power supply nei loin an la awm. Tokyo hmarlam, Fukushima prefecture chuan thlipui tleh hi an tuar nasa ber. Abukuma lui lian chuan a chhevela thlai chinna ram zau tak a chim bawk. He bial chhungah hian thlipui tlehin chhiatna a thlena thi mi 25 an awm a, tuilianin nasa takin a chim bawk. 

Prime minister Shinzo Abe chuan chhiatna thleng hian an ram economy hun rei tak a nghawng phah dawn niin a sawi. Hemi rual hian sorkar chuan thlipui leh tuilian tuarten nunphung pangngai an zawm leh thuai theihna turin theihtawp a chhuah dawn tih a sawi. 

Finance minister Taro Aso chuan chhawmdawl hna thawhna tur hian sorkarin sum a dah, yen tluklehdingawn 500 (dollar tld 4.6) chu hman theihin a awm tih a sawi a, a ṭul a nih chuan sum pawh dah belh a ni ang, a ti.