South Africa president hlui court-ah inlan

South Africa president hlui Jacob Zuma chu nimin khan eiruk thubuai avangin court-ah a inlan. Pietermaritzburg High Court Judge Sharmaine Bolton chuan Zuma hi hun pek belhin a thubuai hi nakkum February 4-ah ngaihtuah leh turin thutlukna a siam.

Zuma laka thubuai thehluttute hian kum 8 chhung zet Zuma hi an chhui a, kum 1990 chho khan European firm panga leh French defence company Thales aṭangin, sipai ralthuam, jet fighter leh patrol boat an leinaah US dollar maktaduai 4.07 thamna laa puh a ni.

South Africa-a rorellai party, African National Congress (ANC) chuan nikum khan Zuma hi kum kua chhung hruaitu a nih chhunga eirukna hrang hranga inhnamhnawiha a puh hnuah, president a nihna aṭanga bang turin a nawr zui a ni. 

President Thabo Mbeki hnuaia deputy president a nih lai khan, Zuma hi vauna leh inbumna nena eizawnga puhin, eirukna leh thuneihna hmang dik loa puhna hrang hrang 16-a nei bawk. Jacob Zuma hian kum 1958 khan ANC hi a zawm a, kum 2009 aṭanga 2018 February 14 thleng khan South Africa president nihna a chelh a ni. South Africa zalenna sualtu Nelson Mandela rual khan Robben Island taninah kum 10 zet a lo tang tawh bawk. A chhuah hnuah pawh hun eng emaw chen ram dangah tlanchhiain, kum 1990 khan South Africa-ah a kir leh chauh a ni.