US House-in Hong Kong Democracy Act pass

US House of Representative chuan Thawhlehni khan Hong Kong-a nawrh huaihawt mekte thlawpna, Hong Kong Rights and Democracy Act a pass.  

House-in bill a pass hi Hong Kong-a civil rights humhalhna tur a ni. House-in a pass hnuah Senate-ah ngaihtuah a ni ve leh ang. Republican Representative Chris Smith chuan China president Xi Jinping leh Hong Kong Chief Executive Carrie Lam te chu Hong Kong-in dikna chanvo a neih leh thuneihna hran a neihte humhalh sak tura sorkarin a lo intiam tawhnate vawngnung turin an phut tih a sawi. 

Hong Kong Rights and Democracy Act hi Senate-in a pass a, law a chan tawh chuan Hong Kong in US laka special trading status a neihna chu tihtawp a ni dawn a, he status nei leh tur chuan State Department-in Hong Kong thuneituten human rights leh rule of law te an zawmin an humhalh a ni tia a pawmpui leh phawt a ngai dawn a ni. 

Democrats member, Ben Ray Lujan pawhin House chuan Hong Kong mipuite tan thuchah, democracy leh rorelna dik tungding tura an beihna kawngah an thlawp tlat a ni tih bill pass hmang hian a hriattir a ni, a ti. China lam chuan US House bill pass  hi na takin a sawisel nghal. China hian ramdangte inrawlh avangin Hong Kong buaina neih mek pawh a punlun phah niin a lo sawi tawh a ni. China foreign ministry thupuangtu Geng Shuang chuan thuchhuah siami, Hong Kong in buaina a tawh mek chu human rights leh democracy lam thil a ni lo a, tharum thawhna leh  dan leh thupek kenkawh tumna zawk a ni tih a sawi. Geng chuan US chu inrawlh lo tura tiin, a ṭul a nih chuan Hong Kong bill an pass do letna tur hian hma an la dawn tih a sawi.