Spain-in Catalonia hruaitute tang tura a hrem vangin buaina chhuak

Spain supreme court chuan Thawhṭannia Catalonia inde­pendence puannaa hruaitu pakuate tang tura a hrem hnu lawkah Catalonnia-ah buaina nasa tak a chhuak a, police leh mipuite an innawrbuai nasa hle.

An ram hruaitu hluite inlakhran duha puhna avanga rang tura hrem an ni hi mi tam tak chuan duh loin Thawhṭanni leh Thawhlehni khan nasa takin duh lohna an lantir a, ni hnih chhung hian mipui leh police-te chu an innawr buai nasa hle.

Barcelona-ah chuan mipui thinrim hian sorkar office-te pawh beih an tum a ni. Duh lohna lantirtute hian app pakhat 'Tsunami Democratic' tih hmangin, Catalonia khawpui hrang hrangah nawrh huaihawt tur hian an inkokhawm nia report a ni bawk.

Catalonia regional sorkar thupuangtu Meritxell Budó chuan mipuite lungawi lohna chu an hrethiam hle tih an sawi a, hetihlai hian Spain thuneitu lam chuan buaina chawkchhuaktu chu an zawng mek tih a sawi. Barcelona-ah chuan police-te chuan mipui pungkhawm hnawhdarhna atan hian tear gas-te an hmang a, sorkar building-a luh tumte hi an hnawt darh a ni. Tualchhung media-te chuan mi pathum man an nih tawh bakah damdawi-ina enkawl ngai hliam tuar mi pakua an awm tawh tih an sawi bawk.

Barcelona mai bakah hian Girona leh Tarragona khaw­puiahte pawh duh lohna hi lantir a ni bawk a, nawrh huaihawtnaa tel hi an tam hle a ni. Thawhṭanni khan inkal­pawhna atana an kawngpui hman ber pakhat Barcelona-a El Prat airport kawngpui chu duh lohna lantirtute hian an dang a, hemi avang hian thlawhtheihna 100 chuang zet chu cancel a ni hial bawk.