Lebanon-in ramkang vangin ramdangte ṭanpuina a ngen

Lebanon khawthlang lama ramkang chuan ziaawm lam a pan mai loh avangin, kangmei ṭhelhna kawngah Leba­non chuan ramdangte ṭanpuina a ngen.

Thawhṭanni aṭang khan Lebanon ram kang hi a inṭan nia hriat a ni a, thli lum chak tak a tleh tel  avangin ramkang hi a zual zel nia hriat a ni bawk. Lebanon khawpui Beirut chungahte chuan meikhu nasa tak a leng a, kum 10 chhunga Lebanon-a ram kan nasat ber ṭum nia sawi a ni. Sipai leh air force-te chuan ramkang ṭhelh hna hi an thawk mek.

Interior Minister Raya El Hassan chuan an ram kang ṭanpui turin ramdangte an ngen tawh thu a sawi. El Hassan hian a twitter-ah ramdangte hmuh theih turin, meikang tihrem a nih theih nan Cypriot thlawhtheihna aṭanga tui a thlakthla laite pawh a tweet a ni.

Firefighter pakhat chu Beirut chhim chhak Chouf region-ah a thih thu tarlan a ni a, he lai hmun hi Al Shouf Cedar Nature Reserve awmna a nih mai bakah, Lebanon cedar forest lian ber a ni a, helai hmuna thingte hi Lebanon national flag siamna atan hman an ni bawk. 

Ramkang vang hian ramhnuaia hna thawk pahnih an boral tih Syrian media-te chuan an tarlang a ni. Sana news agency chuan kangmei avangin mi 8-in hliam an tawrh thu a tarlang bawk a ni. Kangmei chhuah chhan hi hriat chian a la ni lo. Mahse prime minister Saad Hariri chuan tumreng vanga tih a nih chuan, a titute hian ram an tih kan man hi an chawi a ngai ang, a ti.