U.S-in inkahhai puang tura a rawtna Turkey-in a hnawl

Syria hmar lama inbeihnaah U.S chuan inkahhai puang tura Turkey a tih hnuah, Turkish President Recep Tayyip Erdogan chuan US rawtna hi a hnawl thu a sawi.

Turkey hian Kurdish kaihhruai Syrian Democratic Forces (SDF)-te chu an ramri leh a chhehvel aṭanga umbo beihpui a thlak mek.Turkey chuan SDF hi firfiak pawl lian takah a ngai a ni. Kurdish-te hian Pathianni khan Turkey dona an pumpelh theihna turin, Syria sorkar nen inremna an siam a ni. Russia thlawp Syria sipaite chuan an theihtawpin SDF-te hi an pui dawn.     

Turkey chuan an ramri aṭanga SDF-te umbo hna a thawh avang hian, helai bawrvela khawsa mi 160,000-te chuan hmunhim lam an pan thu UN chuan a tarlang. Hetih lai hian U.S. President Donald Trump chuan an ram Vice President Mike Pence leh Secretary of State Mike Pompeo-te'n Turkey an tlawh dawn thu a sawi.

Pence leh Pompeo-te hi Turkey leh Syria inkara buaina chinfelna hna dap tura kal tur an ni. Erdogan chuan inkahhai puan a duh loh thu a sawi a, mahse U.S nen inbiakna neih phawt a, boruak a zira inremna chu siam a hreh loh thu a sawi. 

Ram pahnih buaina chungchangah hian, Russian President Vladimir Putin pawhin Erdogan hi phone hmanga biain, remchang hmasa bera an ram tlawh turin Erdogan hi a sawm bawk.