Turkey-Syria buaina Kan ramri a ni lo : Trump
United States president Donald Trump chuan Syria-a Turkey-in beihpui an thlaknaah chuan US chuan inrawlh chhan tur a nei lo tih sawiin, "Kan ramri a ni lo" tiin a sawi a, an thurualpui ṭhin Kurds-te chu "angel an ni lo" a ti bawk.
US hian Syria aṭanga a sipaite a lakchhuak khan sawisel a hlawh hle a, Turkey-in Kurdish ho laka beipui a thlak theihna tura 'green light' a peknaa ngai hial an tam hle. Mahse Trump chuan White House-a thuthar thehdarhtuten an kawmnaah US chu 'policing agent' an ni lo tih sawiin an tan chuan an ram lama haw a hun tawh thu a sawi a ni.
Syria aṭanga US a inlakchhuah hnu lawk khan Turkey hian Syria nena an inrinaa cheng Kurdish-te lakah beihpui a thlak nghal a ni, Kurdish-te hi US-in Syria-a Islamic State (IS)-te a umchhuahna kawnga a thawhpui berte an ni a, hemi a nih avang hian US hian dem a hlawh hle.
Trump chuan eng nge a sawi chiah?
Donald Trump hian Ningani khan Turkey-in Syria-a beihpui a thlak chu an buaina tur a nih loh thu leh ramriah buaina an nei a, kan ramri a ni lo. Hemi avang hian kan nunna kan chan tur a ni lo, a ti. "Kan sipaite an awm mek. An him a ni. Indo kher loin buaina an chingfel thei mai thei," tiin a sawi zui.
Kurds-te chu 'angel an ni lo' tia sawi zuiin, "Kan ṭangrual a ni. Kan bula an ṭan theih nan pawisa tam tak kan seng a, chu chu a ṭha e. Kan bula an do lai khan an cheṭha hle a ni. Kan bula an do loh hnuah erawh an cheṭha lutuk ta lo a ni," tiin a sawi.
Kurdistan Workers' Party (PKK)-te chu hel pawl, Turkey-a Kurdish autonomy tana bei an nih thu sawiin, kawng tam takah chuan an che firfiak ve hle tho a, IS ai pawhin an che firfiak a ni," a ti. Turkey chu 'green light' an pe lo tih a sawi bawk a, lehkha pawh hemi chungchangah hian a thawn bakah phone hmang pawhin an inbia tih a sawi. "Mi tam tak tiduhdahtu nih in duh lo ang bawkin, keipawh Turkish economy tichhetu nih ka duh lo," tiin a lehkha thawnah chuan a ziak.
October 9-a Turkey President hnena lehkha a thawnah hian Kurdish-te laka beihpui thlak lo tur pawh hian a ngen a ni. US hian Thawhṭanni khan Turkey ministry pahnih leh minister pathum hrekna a tichhuak tawh bawk.