Philippines-ah lirnghing vangin mi 5 thi

Philippines chhimlam, Mindanao island-ah Nilaini zan khan magni­tude 6.4-a nain lir a nghing a, chhiat­na thlengah mi 5 an thi a, mi 60 chuangin hliam an tuar. Nimin zing khan Davao Oriental pro­vince-ah magnitude 5.3-a nain a nghing leh bawk. 

Philippine Institute of Volcanology and Seis­mology (Phivolcs) chuan lirnghing thlen hun hi an ram huna Nilaini zan dar 7.37 a nih thu an tarlang a, leihnuai km 15-a thuk aṭanga rawn inṭan a nih thu an tarlang bawk.  Aftershock hi hmun 246-ah a thlen thu Phi­volcs chuan a tarlang a, lirnghing vang hian orth Cotabato province-ah hmeichhe naupang kum 9 mi chu in chimin a delh hlum tih media-te chuan an sawi. 

He khua hi lirnghing inṭanna aṭanga km 22-a hlaa awm a ni. Davao del Sur pro­vince-a Magsaysay khua­ah leitawlh vanga inchimin hmeichhe naupang kum 2 mi leh a nu a delh hlum bawk. Information officer Anthony Allada chuan Magsaysay khuaa in hi a chhiat deuh vek thu a sawi. Kidapawan khuaah pawh lirnghing hlauh vanga heart attack neiin mi pakhat a thih thu sawi a ni bawk. Maguin­danao khuaa Datu Paglas hmunah hmeichhe naupang kum 7 mi a boral thu official-te chuan an sawi. 

Lirnghing vang hian Phi­lippines-ah hian chhiatna hrang hrang a thleng a, Davao del Sur province-a shopping mall pawh a kan phah bawk. Philippines ram hi lir­nghing thlen nasatna ram a ni a, an ramah hian thlipui, lirnghing leh tlangkangte a thleng fo a ni. Kum 1990  khan Philippines hmar lamah magnitude 7.7-a naa lir a nghin vangin mi 2,000 dawnin an lo thihphah tawh a ni.