Mexico: Drug kingpin El Chapo fapa man vangin inkahna thleng Buaina chhuah zui loh nan chhuah zalen lehnghal

Mexico-a ruihhlo tawlhrukna lianthama an hotupa, jail-a tang mek Joaquín "El Chapo" Guzmán fapa pakhat chu Mexico security force-ten an man avangin Mexico hmar lamah nasa takin an inkap.

Security force-te hian Culiacán khawpuiah an tihdan phung pangngai angin patrol an nei a, hetah hian El Chapo fapa Ovidio Guzmán López hi hmuin an man a ni. Hemi hnu hian nasa takin darkar eng emaw zat an inkap zui. 

Mexican TV footage-ah chuan ralthuam ṭha tak tak kengte chuan police-te an kap lai a lang a, lirtheite pawh an hmang tih a lang bawk.

Thuneitute chuan buaina lian zawk a chhuah lohna turin a hnuah Ovidio Guzmán López hi an chhuah zalen leh ringawt tih an sawi. Ovidio Guzmán hian a pain a thunun ṭhin, Mexico aṭanga US-a ruihhlo tawlhru ṭhin pawl lian ber Sinaloa cartel hi a vai ni loin a ṭhen azar a enkawl zui a ni.

Thi leh hliam zat report la awm chiah lo mah se inkahnaah hian ruang hmuh tur a awm nual a, police lamah pawh hian hliam tuar an tam hle tih erawh a hriat. Inkahna hmunah hian car leh jeep-te pawh a alh nasa hle a, sipai lirthei pawh eng emaw zat tirhluh a ni bawk.

Sorkar official-te chuan police patrol-te hian Ovidio Guzmán hi in pakhatah manin, cartel member-te hian nasa takin laklet tumin an bei tih an sawi. Mexico security minister, Alfon­so Durazo chuan ralthuam kengte chuan nasa takin Guzmán an manna in aṭang hian security force-te an kap zui tih sawiin, security force lam pawh hi an himna turin an in saseng zui a ni. Hemi a nih avang hian buaina lian zawk a chhuah  lohna turin leh khawpui boruak tihdaihna atan Guzmán chu an chhuah leh ta mai a ni.

Mexico president Andrés Manuel López Obrador chuan hemi chungchangah hian security cabinet meeting a ko zui dawn tih a sawi ve bawk. President hian ruihhlo tawlh­rukna hluar lutuk do let tur hian hma a la nasa hle a, hemi kawnga thawk tur bik, force thar National Guard pawh a din tawh a ni.