Thla thum chhungin Afghan thi leh hliam 4,313 awm: UN

United Nations (UN) chuan Ningani khan kumin July aṭanga September thla chhungin Islamist Taliban firfiak nena inbeihna avangin, Afghanistan-ah civil mi thi leh hliam 4,313 an awm thu a tarlang.

Nikum record nena khaikhin chuan kumina firfiak kut tuar, thi leh hliam awm zat hi 42%-in a tam zawk a ni. Thi zat bik hi 1000 chuang an nih thu U.N. Assistance Mission in Afghanistan (UNAMA) chuan a tarlang bawk.

UNAMA chuan September 28-a Afghanistan-in Presidential election a neihah khan buaina a chhuah avangin, civil mi 85 an thih thu leh mi 370 an hliam thu a tarlang. Heng bakah hian kumin thla kaw chhung hian civil mi 8,000 chuang thi leh hliam an awm thu a tarlang bawk.