Eng vang mahin Pakistan PM a bang dawn lo : Pakistan sorkar

Pakistan sorkar chuan eptu party-ten sorkar laka lungawi lohna lantirin 'Azadi March' huaihawt mah se, prime minister Imran Khan chu eng vang mahin PM a nihna aṭangin a bang dawn lo tih a sawi.

Eptu party chuan Pakistan-ah democracy dik tak tundin leh an duhna lantirin Azadi March huaihawt an tum tih an sawi a, PM chu bang turin an phut bawk. Hetihlai hian defence minister Pervez Khattak chuan eptu party aiawhte nen inbiakna neihpui an tum tih sawiin, eptu lamin PM bang tura an phutna chu thil pawm theih a nih loh thu a sawi. Eptute chuan sorkar tihṭhaih leh vau an tum ber a ni, a ti. Sorkar lamin inbiakna neihpui a tumna hi eptu lam chuan a hnawl a, October 31-a kawngzawh huaihawt an tum pawh hi kaltlangpui an tum tih an sawi a ni. 

Jamiat Ulema-e-Islam-Fazl`s (JUI-F) chief Maulana Fazlur Rehman chuan October 31 hian sorkar laka lungawi lohna lantira kawngzawh huaihawt a tum thu a sawi a, Pakistan Muslim League-Nawaz (PML-N) leh Pakistan Peoples Party (PPP) ten JUI-F hotu an thlawp thu an sawi ve leh a ni. PM Khan a ban hma chuan lungawi lohna hi lantir chhunzawm zel an tum.