Hong Kong hotu Carrie Lam-i Japan-ah a zin

Hong Kong chief executive Carrie Lam chu nimin khan Japan-ah a zin.

Carrie Lam hi vawiina Tokyo imperial palace-a Japan lal, Emperor Naruhito lallukhum khumtirna hun hmang turin a kal a, vawiin tlaiah vek Hong Kong-ah a kir leh nghal ang. Pathianni zan khan Hong Kong-ah sorkar laka lungawi lohna lantir hi chhunzawm leh a ni. Police lamin kawngzawh huaihawt khap mah se, mi tam tak chhuakkhawm lehin lungawi lohna an lantir chhunzawm a ni. 

Hong Kong sorkarin thiam loh chantir tawhte mainland China-a thawn theihna tur, extradition bill siam a tuma vanga lungawi lohna lantir hian thla nga zet a awh tawh a ni. Mipuiten na taka an dodal avangin sorkar chuan bill siam tum hi sut leh mah se, nawrh hi huaihawt chhunzawm zel a ni a, sorkar laka an phut hrang hrangte an lantir zui a ni. 

Pathianni khan nawrh huaihawtte chuan mipui pungkhawmte hnawhdarh nan water cannon an hmang a, tui an phuhchhuah hian Islam hmun pawimawh tak pakhat, Kowlon mosque gate hma lam a phuh tel. Hei vang hian Carrie Lam pawhin Japan a pan hmain water cannon-in mosque a phuh tel avang hian thupha a chawi a, mosque pawh hi a tlawh zui bawk. Chief Imam Muhammad Arshad chuan Lam-i thuphachawina chu an pawm tih sawiin,  Hong Kong-ah chuan hlim leh lungrual taka awmho zel chu Muslim-te chuan an beisei tih a sawi.