US-a Covid-19 hri kai mtd 25 an tling tawh

United States (US) chu khawvela hripui leng mek, Covid-19 hri kai leh thihpui tamna ber ram ni zelin, an rama hri kai hmuh chhuah hi mi maktaduai 25 an chuang tawh.

John Hopkins University data aṭanga a landanin, khawvel puma Covid-19 kai hmuh chhuah tawh zinga hmun lia ṭhena hmun khat chuang chu US ami an ni. An ram mipui awm zat aṭanga 8% velin hri hi an kai tawh a, hripui vanga thi hi mi 4,17,000 an tling tawh bawk. 

US-ah Covid vaccine hi pek chhuah ṭan ni tawh mah se, ruahman lawk ang erawh chuan an pe chak thei lo a ni. US Centers for Disease Control and Prevention (CDC) chuan state hrang hrang hnenah vaccine sem tawh, maktaduai 41.4 zinga a zahve chauh chu mipuiah pek a la ni tih a tarlang. 

Presiden thar, Joe Biden chuan hripui leng mek do hna chu a ngaih pawimawh hmasak ber tur a nih thu a lo sawi tawh a, Congress hnenah pawh relief package USD trillion 1.9 chu pawm turin a nawr mek a ni. January 20 aṭanga President office luahtu, Biden chuan office a luah aṭanga ni 100 chhungin mi maktaduai 100 hnenah vaccine pek hman tum a nih thu a sawi a, hei bakah hian mipuite chu hri leng laka invenna atan ni 100 chhung chu ṭha taka mask vuah ṭheuh turin a ngen bawk. 

Mexico president Andres Manuel Lopez Obrador chuan Covid-19 a kai tih Pathianni khan sawiin, mahse a taksa lamah harsat­na lian tham a nei lo tih a sawi. President Lopex Obrador hian hri a kai thu hi a twitter-ah tarlangin, harsatna nei lo mah se damdawi hmanga a inenkawl nghal thu a sawi. An ramin hripui leng chu an do hneh ngei tur thu a sawi bawk. 

Kum 67 mi, Mexico President hi an rama hri leng dona kawnga a hmalak danah sawisel a lo tawk fo tawh a, hri a len  hnuah lockdown puang har lutukah puh a nih bakah rally pawh a neih chhunzawm reng a, pawn chhuahnaah pawh mask vuah ṭha duh loah puh a ni bawk a ni. 

Mexico hi hri kai tamna ram palina niin, tunah hian hri leng thawh hnihna an tuar mek a ni. An ram khawpui, Mexico City-ah chuan hri kai an pun belh zel avangin nikum December thla aṭagn khan damdawi-in khumte chu 90% chuang luah reng an ni tawh.