EU-in Russia hrek chungchang sawiho dawn

Russia eptu hruaitu Alexei Navalny tan-ina khung duh lo a, chhuah phuta nawrh huaihawt zinga mi 3,000 chuang man a nih avangin European Union chuan Russia hrekna thar siam a nih dawn leh dawn loh an ngaihtuah dawn.

Navalny hi Germany aṭanga Russia rama a haw chu Moscow airport-ah lo man nghal a ni a, hei hi duh loin Inrinni liam ta khan amah thlawptute chu pungkhawmin chhuah turin an phut a ni. Central Moscow-a an punkhawmnaah hian mi 40,000 vel an tel nia sawi a ni. 

Lithunia foreign minister chuan Navalny chunga thil thleng hi pawm theih a ni lo tih EU chuan chiang taka a lantir a ngai a ni tiin, Russia official ṭhenkhat lakah hrekna siam belh leh a ngai a ni, a ti. EU hian kum 2014-a Russia-in Crimea peninsula a luah chung changah energy, financial leh arms sector-ah Russia hrekna hi a lo siam tawh a, nikum August thlaa tur hmanga Navalny hrai nia sawi kaihhnawihah President Vladimir Putin thawhpui hnaivai tak eng emaw zat chu a lo hrek tawh bawk. 

Latvia leh Estonia ram chuan Russia official-te hrek belh hian thlawp a, Italy pawhin travel ban leh asset freeze chu a thlawp thu a sawi bawk a, Romania pawhin hrekna siam hi a thlawp bawk. Germany foreign minister Heiko Maas chuan Navalny thlawptu hren mekte chu chhuah nghal turin a phut tih a sawi.