Biden-a security adviser-in Israel rawn zel intiam

US president Joe Biden-a national security adviser Jake Sullivan chuan Israel hnenah an ram leh a chhehvel security chungchangah rawn zel a tiam.

National Security Council (NSC) chuan Pathianni khan hemi chungchang hi an sawi a ni. NSC thupuangtu Emily Horne chuan Jake Sullivan leh Israel national security adviser Meir Ben-Shabbat chu Inrinni khan an inbia tih sawiin Israel venhimnaa president Biden-a inpekna chungchang a hriat nawntir a ni, a ti. 

Inrinnia an inbiaknaah chuan Sullivan leh Ben-Shabbat-te chuan US-Israel thawhdunna tur chungchangte an sawi niin NSC chuan an tarlang a, chung zingah chuan Israel-a boruak muanawm a awm chhunzawm zel dan tur chungchangte pawh a tel.

Biden-a US Secretary of State nominee Antony Blinken pawhin kar hmasa tir lamah khan Israel venhimna kawng US inpekna chu tihchhiat thiang lo a nih thu sawi tawhin Biden-a thuneihna hnuaiah boaruak ṭha a awm zel theihna tura hmalak a ni dawn tih a sawi. 

US president chhuak ta Donald Trump khan Israel prime minister Benjamin Netanyahu agenda-te kha a thlawp ṭha hle a, Israel khawpuiah Jeruasalem a puang hial a nih kha. President office a luah tawp dawn lamah khan United Arab Emirates, Bahrain, Sudan leh Morocco-te leh Israel inkara buaina awm eng emaw zat chinfelna kawngah hma a la bawk. Trump-a hmalaknate kha Palestine lam chuan an sawisel nasa hle thung.