Covid-19 : Hri kai thar aiin damdawi-in aṭanga chhuah tam zawk

China National Health Commission chuan Nilaini khan rampum huapa Covid-19 hri leng kai thar mi 394 an awm thu a tarlang. Nilaini vek hian hri kai enkawl zinga dinhmun ziaawm tawh  mi 16,155-te chu damdawi-in aṭanga chhuah niin, hri kai thar aiin hri kai, ṭhat lam pante hi an tam zawk.

Health Commision-in a tarlan zulzui hian China-a hri leng mek Covid-19 hi a ziaawm tiin chanchinbu ṭhenkhatte chuan sawi mah se, nitina hri leng kai thar hi an la awm ziah nia sawi a ni. 

China-a province 31 aṭang leh Xinjiang Production leh Construction Corps aṭangin hri kai thar hi Nilaini khan 394 an nih thu Health Commision chuan a tarlang. Nimin thleng khan China ramah Covid-19 vanga thi hi mi 2,118 an awm tawh a, a hri kai finfiah tawh mi 75,000 vel an awm bawk. 

China rampum huapin hri kai enkawl zinga mi 16,155 te dinhmun chu a ziaawm tawh thu sawi a ni a, damdawi-in aṭanga chhuah zui an ni. Heng zinga mi 1,779 te chu Hubei-a damdawi-in aṭanga chhuah an ni bawk. Heng hri kaite hi China sorkar hmalaknain uluk taka enkawlna pek an ni a, an natna chu a ziaawm tawh niin doctor-te chuan an tarlan hnuah, damdawi-in aṭanga chhuah an ni zui ta a ni. Kumin January 31 aṭang khan Covid 19 hri kai thar punna chu Thawhṭanni aṭang khan Nilaini thleng a tla hniam cho zel a ni. 

Hetih lai hian Tokyo bula lawnglian, Covid-19 an hmuhna, Diamond Princess lawnga chuang zinga mi pahnih chu he hri vang hian an thi niin nimin khan Japan media-te chuan an tarlang. Lawnga chuang zinga mi dang 29 pawh an dinhmun a ṭha lo hle nia sawi a ni bawk. Thi te hi kum 87 leh 84 mi nia sawi an ni. Mahse hei hi health ministry chuan a la nemnghet lo. 

Mi 3,700 chuanna lawng lianah hian Covid-19 kai an awm avangin February 3 khan he lawnga chuangte hi chhuah tir loin awm chhunzawm tir an ni. Lawnga chuang zinga mi 621 in he hri hi an kai tawh nia sawi a ni. Hetih lai hian an dinhmun enfiah an nih hnuah an him tih finfiah tawhte chu  lawng an chhuahsan phalsak ṭan an ni a, nimin khan mi 500 chu hruaichhuah an ni. Mahse virus kai tih finfiah tawhte nena room khat hmangte chu chhuah phalsak an la ni lo thung. 

US, Australia leh Canada sorkar chuan he lawnga chuang an mi leh sate a hruai haw mek a, mahse heng mite pawh hian an ram an thlen hnu hian ni 14 chhung chu an hriselna dinhmun enfiaha dah hran an ni ang. 

China rama Covid-19 leng mek chungchang an ziah danah a lungawi loh vangin China sorkar chuan Wall Street Journal reporter pathumte chu an ram chhuahsan turin thupek a tichhuak. 

Wall Street Journal-a opinion piece-ah,  'China is the Real Sick Man of Asia' tih thupui hmangin, hri leng mek leh nghawng a neih pawi theih dan turte ziah a ni. He hi China thuneitute chuan duh loin, China mipuite rilru a tihnat thute an sawi. 

Ministry of Foreign Affairs chuan hetiang hnam inthliar hranna lam hawi thuchhuah leh, China hmel tibal thei zawnga inbeihna hi mipuite chuan an lawm lo tih sawiin, journalist-te pawh hi an ram chhuahsan tura tih an ni tak thu a sawi.