Hong Kong-in 'Extradition bill' hnawl ta

Hong Kong-a nasa taka buaina chhuah chhan bulpui ber, 'extra­dition bill' chu Hong Kong legis­lature chuan official-in a hnawl.

Bill hi official-a hnawl ni mah se nawrh huaihawtte thil phut panga zinga pakhat chiah tihhlawhtlin a la ni thung. Duh lohna lantirtu ṭhenkhat chuan sorkar chu a che tlai an tih thute leh an thil phut an tih­hlawhtlinsak chu a tlem mah mah nitein an sawi.

Thiam loh changte mainland China-a thawn theihna tur 'extra­dition bill' hi April thlaa pharh a nih hnu lawk aṭang khan Hong Kong-ah hian nasa takin buaina a chhuak zui a, mi tam takin duh lohna lantirna kawng zawh an nei nghal.

Nasa taka duh lohna lantir a nih hnu hian bill hi thuneitute chuan an suspend nghal a, mahse nawrh huaihawt hian ziaawm lam pan thei loin, Hong Kong leader Carrie Lam ban an phut thute auchhuahpuiin hun rei tak chhung chu sorkar laka lungawi lohna hi an lantir zui tho.

'Extradition bill' duh lohna lantirna hi 1997-a British kut aṭanga China hnena Hong Kong hlan let a nih hnua nawrh huai­hawtna nasa ber a ni hial. Hong Kong mipuite hian he bill hmang hian hamṭhatna an neihte chu a bo an hlau a ni.