Widodo-a'n sipai general hlui defence minister-ah ruat

Indonesia President Joko Widodo chuan nimin khan politics lama a khingpui, sipai general hlui kum 68 mi Prabowo Subianto chu defence minister-ah a ruat.

Term hmasa zawka Joko Widodo thlan tlin a nih khan, Subianto hi eptu hruaitu a ni a, defence minister atan a ruat a ni hi sawiseltu an tam phah hle a ni.  "Subianto hi a hna tur ka hrilh a ṭul hran lo a, kei ai  hre zawk a ni," tiin Widodo chuan a fak hle thung. Subianto bakah an party Gerindra aṭangin Edhy Prabowo chu Marine Affairs and Fisheries Minister atan ruat a ni bawk.

Khawvela democracy ram lian pathumna, Indonesia-ah hian nimin khan Subianto bakah, minister 36-te lakluhna inkhawm chu presidential palace-ah neih a ni. A hmain President Joko Widodo leh Vice President Ma'ruf Amin chu lakluh an lo ni tawh bawk.

Economist Sri Mulyani Indrawati chu finance minister a ruat a ni a, Nadiem Makarim chu education and culture minister atan ruat a ni bawk. Erick Thohir chu minister of state-owned enterprises atan ruat niin,  Maritime and Investment Affairs Minister atan Luhut Binsar Pandjaitan chu ruat a ni.