Abe leh Suu Kyi-ten Rohingya chungchang sawidun

Japan prime minister Shinzo Abe leh Myanmar state counsellor Aung San Suu Kyi te chu Thawhṭanni khan Tokyo-ah inkawmin, Myanmar aṭanga Bangladesh rama tlanchhia Rohingya Muslim-te chungchang an sawi dun. 

Shinzo Abe chuan Rohingya raltlante chuan Myanmar rama kir leh  ngei an duh theihna turin boruak ṭha siam turin Suu Kyi a chah. Myanmar-a Rakhine state-a mihring dikna chanvo palzutna a thleng nasa nia sawi chungchangah, Abe chuan Myanmar sorkar leh sipaite chuan boruak ṭha siam tura hma an lak a ṭul thu a sawi. 

Myanmar sipaiten Rakhine state-a Rohingya hel laka beihpui an thlak hnuah, Rohingya Muslim nuai sarih chuang zet chu Bangladesh ramah hian an tlanchhia a ni. Raltlante hruai kir tur hian Myanmar leh Bangladesh sorkar chuan inremna an siam tawh a,mahse tun thlengin raltlan kir duh hi tlemte chauh an la awm a, an tan Myanmar rama kir chu a la him tawk lo niin an ngai a ni. 

Suu Kyi pawhin Rakhine state buaina chu dik taka chinfel a, a ṭul anga hma lak a tum thu pawh Abe nena an inkawmnaah hian a sawi ve bawk. Japan PM hian an ram lal, Emperor Naruhito lallukhum khum­tirna, Thawhlehnia neih hmang tura ramdang hruaitute zin eng emaw zat chu meeting a lo neihpui nghal a ni. Zirtawpni thleng hian ram hruaitu 50 vel chu meeting neihpui a tum a, heng zingah hian Palestinian president Mahmoud Abbas, China vice president Wang Qishan, South Korea prime minister Lee Nak Yon te pawh an tel.