Israel PM atan Netanyahu aiin Gantz duhtu tam zawk

Israel prime minister Ben­jamin Netanyahu chuan ṭang­rual sorkar thar a siam thei dawn lo tih a sawichiang tawh a, hei vang hian a khingpui Blue and White Party hotu Benny Gantz chu sorkar thar siam tura sawm a ni ve leh dawn. 

Sorkar thar a siam theih loh tur thu Netanyahu-a'n a puan hnua Israel mipuite  ngaihdan lakah, prime minister atana Gantz duhtu hi an tam zawk. 

Mipui ngaihdan laknaa chhangtu 46% chuan Netan­yahu aiin Gantz chu prime minister atan an duh zawk tih an sawi. Hemi rual hian sorkar thar a din theih loh a, inthlanpui neih leh an ngai a nih chuan Netanyahu chu mawhphurtuah an ngai dawn tih zawhna chhangtu zinga 37% chuan an sawi a, 30% chuan Netanyahu bakah Gantz chu an dem tel tur thu an sawi thung. 

September thlaa Parliament inthlan neihah khan Blue and White party hian seat 34 lain Netanyahu party Likud Party hian seat 33 a la ni. Joint List chu pathumna niin seat 13 a la a, Israel Beiteinu Party chuan seat 8 chauh a la pha. Ultra-Orthodox party, Shas leh United Torah Judaism seat 7 ve ve an la a, Labor leh right-wing party-te chuan seat 5 an la a, New Right leh Democratic Union ten seat 4 ve ve an la a ni. 

Sorkar siam tur hian seat 120 awmna, Parliament-ah thlawptu member 61 tal an neih phak a ngai dawn a ni.