Israel : Sorkar thar siam turin Benny Gantz sawm

Israel prime minister Benjamin Netanyahu-a'n sorkar thar a siam thei dawn lo tih a puan tak avangin, president Reuven Rivlin chuan Blue and White party hotu Benny Gantz chu ṭangrual sorkar siam turin Nilaini zan khan a sawm ve leh ta. 

President a hmuh hnua thuthar lakhawmtute a kawmnaah, Gantz chuan ṭangrual sorkar din theih ngei a tum thu a sawi a, a kaihhruai sorkar chuan Israel mipuite tan theihtawpin a thawk dawn a ni, a ti. Gantz hian sorkar thar siam turin ni 28 chhung hun a nei dawn a, hemi chhung hian party hrang hrangte dawrin, thawhpui tur a zawng dawn a ni. 

President Rivlin chuan April thlaa inthlanpui an neihah sorkar siam thei loa an awm tawh avangin, tun ṭumah chuan an ram dinhmun leh thil tawn mekte thlirin sorkar thar chu a din ngei a ngai tawh a ni, tiin a sawi. Hetihlai hian Netanyahu chuan Gantz-a'n sorkar a siam tur dan tumin ṭan a la ve thung nia sawi a ni a, right-wing leh sakhaw party-te chu sipai hotu hlui, Gantz thawhpui lo tura hmin tumin hmuh a tum. 

Parliament inthlana seat pariat latu, Israel Beiteinu chu sorkar thar dinna kawngah a dinhmun a pawimawh dawn hle. Gantz pawhin thawhpui turin a sawm dawn a ni. Mahse Israel Beiteinu hotu Avigdor Lieberman hi chi inthliarna thlawptu nia puh a ni ṭhin a, Arab politician-te pawh hmelmate tia sawi ṭhin a ni. Israeli-Arab MP-ten Gantz hi thlawp an tum thu an sawi vangin, Lieberman hian a thawhpui duh dawn em tih a la sawichian theih loh.