Bangladesh-in Mi 16 thi turin hrem

Bangladesh court chuan zirlai hmeichhe pakhat thahna thubuaiah mi 16-te chu thiam loh chantirin, thi turin an chungthu a rel. 

Thla ruk liam ta khan zirlai hmei­chhia, Nursat Jahan Rafi chuan Isla­mic school-a an principal chu mipat hmeichhiat lam hawia a chunga mawi lo taka cheah a puh. A complaint thehluh hi hnukdawk tura tiin beih zui a ni a, mahse a hnuhdawh duh loh vangin khawnvartuia leihin hal hlum a ni. 

Court-in thiam loh a chantir mi 16 zingah hian Sonagazi Islamia Senior Fazil Madrasa-a head teacher Siraj Ud Doula pawh a tel. Doula chuan tualthahna thlengah hian a inhnamhnawih lo niin a sawi a, mahse midang 12-te erawh chu an inpuang niin prosecutor-te chuan an sawi. 

Rafi thah a nih vang hian Bangladesh ramah lungawi lohna lantir a ni a, prime minister Sheikh Hasina pawhin pawikhawihtute chungah rang taka hremna lekkawh a lo tiam tawh bawk. 

Police-te chuan Doula hian jail aṭangin Rafi that tur hian thu a pe niin an sawi a, a thurualpui zingah hian rorellai Awami League Party member pahnih leh zirlai eng emaw zat an tel a ni, an ti. Rafi hi an thah ni hian school inchung zawlah koh chhoh a ni a, mi pangain a kut leh ke phuar sakin an hal tih police-te chuan an sawi. 

Intihlum anga lantir an tum a, mahse Rafi hi talchhuakin in hnuai lamah a tlan thla hman a, damdawi-ina kalpui an tumlaiin amah khawihtu ṭhenkhat pawh a sawi thei a ni. A taksa hmun 80% kangin, dam­dawi-in panpui a nih aṭanga ni nga hnuah a thi a ni.