Trump-a'n Turkey hrekna a hlip

US president Donald Trump chuan US-in Turkey a hrekna chu hlih a nih thu a puang a, "Syria hmarlama inkahhai puan pawh tihngheh a nih thu Turkey chuan a sawi bawk," a ti. 

White House aṭanga thu a sawiah, president Trump chuan Turkey hrekna chu an lawm loh zawnga an che leh a nih loh chuan hlih a ni ta tih Nilaini khan a sawi. Turkey-in Syria hmarlama Kurdish fighter laka beihpui a thlak avangin US hian tun thla tir lam khan hrekna hi a siam a, insumdawn tawnna tura inbiakna an neih mek pawh a titawp bawk. US hian Turkey senior official pathum leh defence leh energy ministry official-te a hrek tel a ni. 

President Trump-a'n Syria hmarlam aṭanga US sipaite a lakchhuah thut avangin sawisel pawh a hlawh hle a, mi tam tak chuan US-in Islamic State (IS) firfiakte a beihna kawnga puitu, Kurdish fighter thlahthlam zuiah an puh a ni. US sipaite lakchhuah an nih hnu hian Turkey chuan Kurdish fighter lakah hian beihpui a thlak zui nghal bawk. Turkey chuan Kurdish fighter-te hi firfiakah a ngai ve thung a ni. Ram dangte nawrna avangin Turkey chuan kar kal ta khan ni nga chhung inkahhai puan a lo remti tawh a ni.