Britain PM-in Dec thlaa inthlanpui neih duh

Britain prime minister Boris Johnson chuan October thla chhung ngeia European Union aṭanga Britain inlakchhuah pui a tumna chu bansanin, kumin December thlaa inthlanpui neih dan kawng a ngaihtuah leh zawk.

EU aṭanga Britain inlakchhuahna tura Britain PM leh EU hruaituten inremna an siam chu Johnson hian Parliament-ah pass tir ngei tum mah se, MP-ten an lo dangchat leh a ni. Hei vang hian Brexit kalpui theih dan tur ber chu inthlanpui neih a ni tiin a sawi. Johnson chuan kar leh Thawhṭanni khian December 12-a inthlanpui neih rawtna motion pu lutin, vote lak tir a tum dawn tih a sawi. 

Inthlanpui neih a rawtna hi tlang tur chuan Johnson hian MP hmun thuma ṭhena hmun hnihte thlawpna a hmuh a ngai dawn a ni. Hetihlai hian eptu pawl, Labour Party chuan EU aṭanga Britain inlakchhuah hun tura bituk, October 31 tih chu tihbo a nih chauhin inthlan rawtna hi an thlawp dawn tih an sawi a ni. 

Britain ram inthlanpui neih hun tur hi kum 2020 a ni a, a hun hmaa inthlan bautsaih tur chuan Johnson hian Thawhṭannia Parliament-a vote lakah hnehna a chan emaw, Parliament-ah amah fiahna a paltlang loh emaw chauhin tihpuitlin theih a ni ang. Mahse eptu lam hian PM rin tawk lohna motion hi putluh an tum rih lo.