Bolivia inthlanah Morales a chak leh

Sawisel hlawh tak Bolivia inthlanah Bolivia president ni mek Evo Morales bawk thlantlin leh a ni tih electoral tribunal (TSE) chuan a tarlang.

TSE tarlan dan chuan Morales hian vote tla 99.9% chhiar tawh aṭangin 47.1% a hmu. Hetihlai hian inthlan result hi khawih chingpen nia puhna a awm avangin darkar 24 chhung vote chhiar pawh chawlh lailawk a ni a, vote chhiar chhunzawm a nih hnuah Morales hi chak zawka puan a ni leh ta a ni.

Bolivia hi Pathianni liam ta khan an inthlang a, Morales hi Carlos Mesa chuan dawtin vote 36.51% a hmu thung. Mesa hian inthlan second round neih leh rawt mah se Bolivia inthlan dan(law)-ah chuan 10% aia tama an chak a nih chuan second round hi neih a ngai lo a, hei vang hian Morales hi chaka puan a ni.

TSE official chuan vote 0.01% erawh chhiar tel theih a ni dawn lo tih sawiin, hei hi Beni-ah November thlaah inthlan ṭhatna neih a nih dawn vang a ni. Hei hian inthlan result-ah erawh nghawng a nei tham tawh lo thung.

Sawisel hlawh inthlanna

Inthlan result khawih chingpen nia puhna a awm avanga vote chhiar darkar 24 chhung chawlh lailawk a nih a, TSE website tihtawp a nih hnua chhunzawm a nih leh khan Morales hian 10%-in hma a lo hruai hman a, hei hian sawisel a hlawh hle.

Inthlan endiktu Organization of American States (OAS) pawhin hei hi a ngai thutak hle a ni.